港富豪曾同特朗普打官司

文章日期:2016年11月10日

【明報專訊】特朗普出乎意料當選,相信除咗令一眾希拉里粉絲傷心欲絕,唔少人哀號「世界變了樣」之外,恐怕千里以外嘅幾名香港富豪,包括「純官」鄭家純同「上海姑爺」羅康瑞應該發夢都無諗到,十幾年前曾經同自己對簿公堂嘅人,今日會成為美國總統。

講緊嘅係1994年嘅事,當年特朗普陷入財困,喺紐約林肯中心附近一塊地皮畀銀行call loan,最後死死氣飛嚟香港搵到彤叔、上海姑爺、邱達昌等一班香港富豪注資。

羅康瑞笑言要移民火星

11年後,成班香港富豪高價拋售,結果特朗普認為佢哋無事先通知自己、同埋賣得太平,於是入稟法院要求索償但又輸咗官司。如今事過境遷,當年輸咗官司嘅生意人變成咗美國總統,彤叔就走咗。早前上海姑爺同媒體講笑咁講,如果特朗普成功當選,要移民火星!

[小琴密語]