湯文亮﹕售樓處做訪問 傾向唱好樓市

文章日期:2016年10月19日

【明報專訊】有資深記者同我講,樓市被唱好抑或唱淡,在某個程度上決定於被採訪的人,而誰人又能被邀請接受訪問,這是記者決定的。

換句話說,記者是可以主導樓市被唱好抑或唱淡,如果記者訪問一些剛剛賣走僅有一個單位的業主,無論那位業主是否有壓力賣樓,他都會表示唔睇好樓市,所以,他們身體力行,將自住單位都賣走,如此肯定做法,任何人都唔夠膽話他們的決定是錯誤的。

不過,記者又如何能夠搵到那些剛剛將唯一物業賣走的人?所以,唱淡的人大多數有多少分量,可以將他們的意見傳達到記者那邊,但是會有一個現象,對於那些自願提供資料的人,記者認為是不勞而獲,是不大理會,亦無謂替那些人造勢,所以,睇淡樓市的信息大多數是物業代理行或測量師行主動提供,但隨着市場變化,他們又可以在瞬息間由睇淡變成睇好,實在是很難捉摸。

代理測量師常轉軚 睇法難捉摸

近日,有超過六成以上受訪者睇好樓市,我有多少覺得奇怪,點解突然間咁多人睇好樓市,而且其他人並不是完全唔睇好樓市,只是一半半,有兩成人認為樓市會橫行,另外兩成才認為樓市會下跌,於是我問那位資深記者,誰不知他反問我是否知道他在哪裏做訪問,原來記者在新盤售樓處訪問那些準備買樓的人,所以有六成以上受訪者都認為樓價會升,兩成比較保守的人就會說樓市會橫行,最後兩成就話雖然唔睇好樓市,但有自住需求,就算唔睇好都要買。

我終於明白,不過就認為如果去買樓,一定是睇好樓市,就算是被地產商的優惠條件吸引,大前提仍然是睇好樓市,因為買樓除了買入物業資產之外,還會買入一大筆債務,物業資產是會減值的,但債務不會。

紀惠集團行政總裁

[湯文亮 敢說亮話]