李小加:用洪荒之力盼來深港通 - 20160819 - 報章內容 財經 - 明報財經網

李小加:用洪荒之力盼來深港通

文章日期:2016年8月19日

【明報專訊】近日中國游泳女將傅園慧一句「洪荒之力」紅遍中港台三地,港交所主席李小加亦好跟得上潮流,噚日笑住話佢哋用咗「洪荒之力盼來了深港通」,所以𠵱家要喘口氣,慢慢咁解決問題。人哋傅園慧用完洪荒之力就創下個人最佳成績,第2日仲拎埋100米背泳銅牌,仲猛話好滿意;不過呢,似乎市場對於港交所用洪荒之力換嚟嘅深港通就唔算太滿意咁噃。

光大唐雙寧題詞賀上市

另外,噚日成功喺香港上市嘅光大證券,集團董事長唐雙寧雅興大發,唔單止畫咗隻牛送畀港交所,寓意「港A股通了就牛了」;仲親自題咗首詞去慶祝光大證券上市。光大旗下8家公司有10隻股票上市,佢致詞時仲盞鬼咁話,諗住一年敲一次鑼就得啦;點知成班員工就叫佢下個月要再嚟香港為光大綠色能源上市敲鑼,完全無考慮過佢手臂嘅感受。唐董,小琴都好想一嘗敲鑼嘅滋味啊!

email: piano@mingpao.com

[小琴密語]