林建岳唐唐合資開中菜館 - 20160708 - 報章內容 財經 - 明報財經網

林建岳唐唐合資開中菜館

文章日期:2016年7月8日

【明報專訊】旅發局主席林建岳出名識飲識食,旗下有近20間餐廳,而佢間中菜餐廳唐人館噚日就喺尖沙嘴海港城正式開幕,岳少話,佢嚟緊仲有間意大利餐廳Operetta,8月中就會喺金鐘太古廣場開幕,佢份人食嘢最唔開心就係訂唔到位,𠵱家旗下咁多間餐廳,捧返自己場就唔怕book唔到枱啦!

唐人館噚日開幕仲有好多城中名人到場支持,其中,全國政協常委唐英年都有到場。岳少透露,原來唐唐都有份投資,不過就冇講具體投資比例。

岳少話,𠵱家個市雖然唔多掂,消費力亦下滑,不過,只要餐廳質素保持水準,啲客一定會返嚟,所以佢自己亦時不時同大廚傾吓有咩新菜式,自己又有得試食,不知幾開心。每次講起餐廳嘅菜色,岳少都講到眉飛色舞,佢話,餐廳雖然唔係佢主業,不過係一個好好嘅嗜好,能夠將嗜好融入工作,係一件好快樂嘅事。

email: piano@mingpao.com

[小琴密語]