敢說亮話

湯文亮:這個世界充滿「真實謊言」

文章日期:2020年7月31日

【明報專訊】今日是7月最後一日,今年渾渾噩噩已經過了7個月,都唔知道做過乜嘢事,總之日過日,政府早兩日全面禁堂食,之後發覺行唔通,立刻放寬禁令。林鄭應變速度之快,大家反而覺得不真實,如果政府在兩三個星期後才考慮取消,反而會覺得這才是香港政府處理方法。

不過,無論如何,現時政府總算聽到市民的心聲,唔係只聽專家的意見,專家的意見其實很簡單直接,就是乜都禁,大家唔准出街,全部WFH,病毒自然會消失。大家會認為專家的說話是真實的,其實是謊言,因為根本無可能做得到,最多只能話專家所講的是「真實謊言」。

專家倡乜都禁 實際無可能

有內地老友話佢去年買的新樓,最近地產商大幅減價三成,佢當然唔開心,立刻問替他促成交易那名物業代理,答案是樓價始終會回升,有買貴,冇買錯,現在只是暫時失利,老友聽完始終覺得有買貴冇買錯是有多少唔妥,但又講唔出是什麼唔妥,於是問我那名物業代理有沒有講錯。

有買貴是真實 冇買錯是謊言

老友可能唔知道,我有好多物業代理老友,真的唔想講壞話,大家都是搵食,况且減價是地產商而非物業代理,於是話那位物業代理所講的是真實謊言,有買貴是真實,冇買錯是謊言,老友亦明白,牛唔飲水唔撳得牛頭低,始終最終都是由他自己做決定,唯有苦笑。

有年輕女友人最近甩拖,宣布與男友分手,她相當不忿氣,對其他朋友話前度當日追佢時,尤其是𧨾佢上牀的一刻話會愛佢一生一世,至死不渝,唔會有第二個女朋友,都未夠半年,已經同第二個女仔約會,佢話前度係大話精。其實,所有女仔都知道,所有男仔都是大話精,不過,男仔話愛女仔一生一世的時候是講真實說話,而最後做唔到,但不能夠話男仔講大話,最多只能話他們講的是真實謊言。

紀惠集團行政總裁

[湯文亮 敢說反話]