敢說亮話

湯文亮:物業投資市場的 Corona Effect

文章日期:2020年4月8日

【明報專訊】多年前我初學投資物業時,請教一些資深投資者,老實說,唔會有人教。不過,大家經常一起飲啤酒,我又經常埋單,或多或少都會學到一些投資技巧。

接資深投資者「摩貨」蝕錢機會小?

有一日,有一名投資者在飲啤酒時叫了一支當時是新出的墨西哥啤酒,大家或者知道是Corona,我覺得那款啤酒很奇怪,因為飲啤酒大多數喜歡大啖大啖飲,但那款啤酒樽口非常之窄,仲要在樽口塞一粒檸檬,飲得非常之不暢順,那名投資者話,新晉投資者很難睇到物業真正價值,如果唔想買錯,最好方法是向資深投資者買入他們的「摩貨」,畀多少錢他們賺,因為資深投資者已經做了分析,以後蝕本的機會就會減少,方法與墨西哥啤酒一樣,叫Corona Effect,或叫日環效應,前輩仲強調,如果要做一名成功投資者,這些錢一定要畀人賺。

老實說,我半信半疑,因為當時很多「摩貨」到最後一刻都會取消交易,如果我「摩」入,可能買貴很多,這些日環效應不學也罷。不過,我不但沒有踢爆,而且仲千謝萬謝,這是最基本的禮貌。

當我事業有所小成的時候,有一日,有一名業主搵我,他要求我買入他名下一個物業,簽定了一份買賣合約,但不需要付任何訂金,物業代理會將這份合約搵下一名買家,如果成功銷售,差額賺價是屬於我的,如果不能夠銷售,到最後一刻就會取消合約,我亦不會有任何損失。我當然沒有答應,否則隨時被業主與接貨買家夾埋屈番轉頭,光棍佬教仔,便宜莫貪,這句話我還是記得。

辣招降低Corona Effect機會

很多人不滿意政府的打擊炒樓措施,認為擾亂了樓市的正常運作,但我有不同睇法,辣招不但加重了炒樓成本,並且降低了那些Corona Effect的機會,買家尤其是那些初次買樓的人,唔會畀人在中間賺了差價。

紀惠集團行政總裁

[湯文亮 敢說反話]