敢說亮話

湯文亮:借錢畀人 再見也不是朋友

文章日期:2019年12月31日

【明報專訊】我有一個朋友,一向都自認是馬雲朋友,不時話同馬雲飲茶食飯唱K,近兩日一反常態,竟然話與馬雲不熟,絕對不是他的朋友,即是潮語所謂的割席。其他朋友都不明白他的意思。

原來馬雲最近表示,每天都有大約五個朋友問佢借錢,大家都認為馬雲只不過是暗示內地與香港的經濟轉差,他的朋友已經非富則貴,但亦要問他借錢,誰不知他這樣說,傷害了他所有朋友的弱小心靈,如果自認是馬雲的朋友,有可能被人誤會財困,曾經向馬雲借錢,所以,馬雲不少朋友紛紛與他割席,就算不是明割都會暗割。

老實說,馬雲不明白一件事,就是借錢畀人,再見也不是朋友,所以,他只能話每天有五個人問佢借錢,因為那些人借到錢之後就已經不當他是朋友,就算沒有即時表達,但當馬雲叫他們還錢的時候,就知道那些人是不是朋友?

臨近年底 多朋友因財失義

今日是大除夕,亦是不少老友反目的日子,不少在今年內問老友借錢的人都會話在年底前本利歸還,今日就算可以還錢,雙方已經不會是朋友,但唔還錢的機會大過還錢,既然冇錢還,雙方更加不會是朋友。我講大家或者會唔相信,不少人會埋怨當日借錢畀他的人,他們會話,如果冇人借錢,他們就唔會買樓,現在樓價下跌,仲邊度有錢還,那些欠款凍過水,借錢畀人收唔返仲要畀人鬧,點解仲要借錢畀人?

婉拒朋友借錢買樓有計

有老友唔想借錢畀人,又唔知點推,問人借錢的人有一個習慣,就是借到之後會叫對方不要將借錢的事張揚,否則可能影響他的聲譽,大家可以根據這個原則,當借錢畀人的時候要求多一至兩個大家都相識的朋友做見證,借錢的人大多數都不會答應,借錢的事最後就會不了了之。

不過,有時又要主動借錢畀人,因為可以解决一些麻煩事,例如唔想同人合作做生意或者買樓,可以話自己冇運,恐怕連累對方,不如借錢給他們,對方大多數不願意,因為他們的目的是別人入股,如果蝕錢就不用還,問人借錢始終要還。

紀惠集團行政總裁

[湯文亮 敢說反話]