【明報專訊】雖然仲有成個幾月先至到2010年，但係恒隆集團(0010)主席陳啟宗噚日已經搶先向員工宣布好消息。講緊嘅係恒隆員工可能有人工加。之但係，小琴最想恭喜嘅，係恒隆嘅董事總經理袁偉良，事關佢近日已經變相加人工8420萬，相信袁生今年可以開開心心過肥年喇！
點解話袁生變相加人工？事關小琴噚日發現，據港交所網站上公司股權披露資料顯示，袁生申報，於10月5號，增持250萬股恒隆集團，然後再於11月18日減持同樣250萬股。
其實袁生係先以每股6.12元，行使認股權，認購250萬股，成本價1530萬元，然後再以每股39.8元，沽出套現，一買一賣，淨賺約8420萬元。
今年總年薪1.1億
袁生喺08/09年度(6月底年結)內，人工係2570萬，僅次於主席陳啟宗，𠵱家再賺8420萬，即總年薪有成1.1億元，晉身年薪過億元嘅打工皇帝之列。
據恒隆年報，呢批認股權係2000年恒隆發畀袁生，有效期10年，到明年2月23日就到期，每股行使價6.12元，即係再等3個月就到期，𠵱家恒隆股價咁靚仔，係人都會行使認購權喇！
恒隆員工可能加薪
講番恒隆加人工，陳啟宗噚日出席一個公開場合時，被問及公司會否加薪時話，恒隆資金狀况理想，處於淨現金狀態，加上較早前推售君臨天下，銷售收益達70多億元，盈利約50多億元。集團盈利好，與員工分享亦屬合理嘅事，故此集團不會減薪，會考慮加薪，至於加薪幅度則需視乎情况而定。
報料電郵﹕piano@mingpao.com
