【明報專訊】早排股市暢旺，股價表現一直麻麻地的紙業股，都反彈咗唔少。好似針對中國內需市場的群星紙業(3868)，3月至今累升幅度已經超過1倍，所以佢一出咗份倒退兩成的中期業績之後，噚日股價即刻應聲跌咗11%，報3.72元。不過，小琴再睇真啲，其實扣除咗利息收入同埋金融投資價值變動的影響，核心盈利都有5%增長，表現算是不過不失。
群星主席朱玉國噚日都話，佢一啲都唔擔心股價一兩日的波動。管理層仲透露，喺公司07年上市時入股的基礎投資者，好似周大福、長實(0001)咁，都一直無咩點沽過貨，而劉央的西京投資都係佢地嘅股東，陣容可謂星光熠熠。
講番群星老細朱總，話說朱總祖籍山東，兼喺個度起家，而群星總部所在的鄒平縣，就位處濟南以東。小琴即刻向朱總討教一下當地的風土人情時，先發現嗰度原來係北宋名相兼思想家范仲淹成長的地方。
朱總仲話，其實范仲淹和佢嘅祖先，都有好深淵源！話說范仲淹的父親好早就過咗身，喺佢仲係小朋友嘅時候，佢媽媽就帶住佢改嫁咗畀朱總近千年前的一名祖先，當時范仲淹仲改名叫「朱說」，到後來長大後做官，經皇帝同意之下，先改用番生父的姓氏。
投資千萬拍范仲淹電視劇
所以朱總𠵱家都會把范仲淹《岳陽樓記》的名句「先天下之憂而憂，後天下之樂而樂」掛在嘴邊，仲有參與內地范仲淹研究會的工作，研究一下佢嘅學術思想咁話。小琴睇番內地報章報道，仲發現朱總去年就投資過千萬元，打算拍攝有關范仲淹的電視連續劇！
報料電郵﹕piano@mingpao.com
