【明報專訊】瑞安房產(0272)主席羅康瑞私人押注7000幾萬銀入股意馬(0585)，究竟為乜？唔少人都知道，羅康瑞旗下幾間上市旗艦都以發展房地產為主，而意馬本業則為動畫製作，兩個風馬牛不相及的行業，加上意馬市值只有8億多，點解會得到羅先生青睞呢？其實，羅先生非單同意馬第二大股東洪錦標有緊密生意合作，根據小琴手足供料，洪先生嘅太太Jocelyn Chu，就係羅先生密友朱玲玲嘅胞姐。
羅洪有密切生意往來
事實上，根據一眾小琴調查顯示，洪錦標所持有嘅公司大部分均與太太Jocelyn Chu共同持有，而Jocelyn Chu本人亦有與兩名姐妹(包括Evelyn Chu同Loletta Chu即朱玲玲)合組公司。至於洪錦標本人所成立兩個基金，包括永菱通(Winnington Capital)以及錦標基金(Trophy Fund)亦先後入股羅康瑞旗下瑞房於上海、重慶以及武漢4個項目，除此之外，洪錦標最早成立私募基金嘅資產出售咗畀瑞安。
其實洪錦標響意馬角色係其中一個投資者，繼大股東高氏後，第二大股東，持股量係24.05%(以完成批股給羅氏後計算)，由於洪錦標係透過意馬早年所發嘅CB(可換股債券)入股，所以佢向意馬嘅投資，到今日都係賺錢嘅。據小琴既了解，永菱通過去投資回報往績亦不俗。
羅生發言人：意馬值得投資
小琴向瑞房查詢今次羅先生入股意馬既原因，羅先生就透過公關答小琴：「羅先生本人私人持有投資公司，一向都會搵一啲有潛力同有投資價值公司進行投資，亦經常會有買賣投資。」
不過，意馬噚日只係trade咗8分鐘就停牌，響短短8分鐘裏面，股價暴跌超過16％，以瑞安平均每股購入價0.5966元以及1.306億股計算，單係尋日羅先生就蝕咗1130萬元。
意馬昨日暴跌16%停牌
而意馬昨晚發公告，話昨天朝早獲得瑞安通知，羅先生早於今次批股之前，已持有意馬3.01%股權，計埋今次向佢批出嘅股份，完成交易之後，羅先生響意馬持股量係10.41%先啱，即意馬第三大股東。
;)